Мундобаскетот започнува за осум дена, за жал на натпреварувањето организирано во три азиски земји, нема да ги видиме некои од најдобрите кошаркари на денешницата.
Иако ова требаше да биде најголемиот кошаркарски собир за оваа година, повредите, откажувањата, психичкото здравје и физичкиот напор, обврските кон НБА лигата летово ги обликуваа ростерите на многу репрезентации.
„Баскетњуз“, направи список на играчи кои ќе го пропуштат Светското прввенство во Јапонија, Индонезија и Филипини кое трае до 25-ти август до 10-ти септември.
На чело на таа листа е српскиот кошаркар Никола Јокиќ, кој по освојувањето на шампионскиот прстен во НБА реши да не биде дел од тимот на Светислав Пешиќ.
На репрезентативните обврски не одговори ниту неговиот сонародник,новиот плејмејкер на Оклахома, Василије Мициќ, кој по сезоната во Ефес, летово ќе го искористи да се подготви за дебитантскиот настап во НБА лигата.
Ѕвездата на Милвоки, Јанис Адетокумбо, нема да може да му помогне на тимот на Димитрис Итудис поради операцијата на коленото, а грчката репрезентација ќе биде и без Ник Калатес, Тајлер Дорси и Костас Слукас.
Франција на СП ќе игра без првиот пик од годинешниот драфт, откако Виктор Вембањама реши да го искористи ова лето за да се подготви за сезоната во најсилната лига на светот. Дресот на „триколорите“ нема да го носат и Франк Ниликина, Родриг Бобуа и Килијан Хејс.
Веста дека Рики Рубио ќе го пропушти Мундијалот поради проблеми со менталното здравје го шокираше кошаркарскиот свет, па еден од најдобрите плејмејкери нема да може да им помогне на Шпанците да го одбранат светскиот трон.
„Црвената фурија“ нема да смета ниту на Лоренцо Браун, додека Кристапс Порзингис поради повреда во последен момент отпадна од списокот на Летонија.
Домантас Сабонис нема да ги брани боите на Литванија, меѓу италијанските кошаркари ги нема Данило Галинари, Нико Манион и Дариус Томпсон.
Словенија на чело со Лука Дончиќ овојпат ќе ја нема помошта од Горан Драгиќ и Влатко Чанчар. Драгиќ се пензионираше, а Чанчар доживеа тешка повреда на еден од подготвителните натпревари пред СП.
Австралија ќе биде без Бен Симонс, Јапонија без играчот на Ла Лејкерс, Руи Хачимура, а плејмејкерот на Њу Орлеанс, Хозе Алварадо нема да настапи за Порторико.
Последен кој го откажа учеството на СП е најдобриот Канаѓанец, Џамал Мареј.
