Министерот Фатмир Бесими вели дека секогаш кога се потребни пари за нешто се посочува на Министерството за финансии, но улогата на ,инистерството, потенцира тој, е во текот на креирањето на Буџетот да се каже рамката – колку пари има на располагање, колку ќе бидат приходите и како ќе се распределат.
По протестите и барањата на пациентите со цистична фиброза државата да им го набави лекот „трикафта“, министерот за финансии, Фатмир Бесими, вели дека за набавката на лекови за ретки болести мора да се најде трајно решение.
„Мора да се фокусираме да надминеме секакви евентуални бирократски или други препреки за да се најде трајно решение за набавка на лекови за луѓето со ретки заболувања“, рече Бесими во гостувањето во Дневникот на ТВ Сител.
Секогаш кога се потребни пари за нешто, вели тој, се посочува на Министерството за финансии, но улогата на Министерството, потенцира, е во текот на креирањето на Буџетот да се каже рамката – колку пари има на располагање, колку ќе бидат приходите и како ќе се распределат.
„Проблемот со набавка на лекови за ретки болести е од поодамна. За последниот случај имаше заклучок на Влада, имаше состаноци за да се реши проблемот, се најде решение, се донесе одлука на Влада дека ќе се излезе во пресрет и вчера се донесе одлука тоа да се реализира најбрзо што може“, вели министерот.
Бирократските процедури за набавка на лек,конкретно за цистична фиброза, е актуелна тема во јавноста изминатите денови. Пред два, почина пациентот Благојче Илиевски, чекајќи државата да го набави лекот. Пациентите досега неколку пати излегуваа на протести, а вчера беа на средба и со премиерот Димитар Ковачевски.
„Од тоа што е сигурно е дека се обезбедени над 2 милиони и 200 илјади евра кои ќе се искористат во најбрз рок за да може да се даде лекот на најкритичните пациенти. Исто така, тоа што е важно за нас, е што се направи тригодишна програма која ќе ги покрие сите пациенти и во рок од три години ќе се добие лекот за сите пациенти, не како што беше пред тоа со одредени шпекулации со бројки и функционалност на белите дробови и други параметри за добивање на лекот. Сметаме дека доколку ова се движи како што разговаравме, ќе има системско решение на проблемот за сите пациенти со цистична фиброза, а се надевам дека ќе биде и за другите ретки болести и проблеми кои ќе ги имаат пациентите“, изјави по вчерашната средба претседателот на Асоцијацијата на пациенти со цистична фиброза, Фики Гаспар.
