Контроверзниот менаџер на лондонскиот премиерлигаш Чезли, Жозе Мурињо е повторно во центарот на фудбалското внимание но сега поради изјавата која ја даде по првенствениот натпревар против екипата на Вест Хем.
Нездоволен од неочекуваното реми, португалскиот стручњак јавно изјави дека Вест Хем игра фудбал од 19 век.
“Ова не е англиска Премиер лига, ова не е најдобрата лига во целиот свет. Ова е фудбал од 19 век. Многу е тешко да се игра кога само еден тим сака да игра фудбал, а другиот сака да се брани. Фудбалот е игра помеѓу два тима. Му кажав на Сем Алардајс дека сум свесен за нивната потреба од бодови, но му кажав дека таквиот стил на игра е неприфатлив. За нив е прифатил, тие имаат потреба од бодови. Требаше да донесам уште еден чекан. Само така ќе го срушев ѕидот на Вест Хем”, изјави трофејниот португалски стручњак.
