За 130 отсто поскапа струја ќе плаќаат најголемите потрошувачи од 1 јули, дознава Сител од извори вклучени во креирање на тарифите.
РКЕ денеска ги објави конечните блок тарифи според кои ќе се наплаќа потрошувачката на струја. „Границите беа проширени за да им се олесни на домаќинствата кои се греат на електрична енергија, истакна претседателот на Регулаторна, Марко Бислимоски.
Според новите рамки, првиот блок ќе ги опфаќа потрошувачите до 210 киловат часа, вториот до 630, третиот до 1050, и четвртиот за потрошувачите над 1050 киловат часа.
Потрошувачите од првите три блока треба да добијат пониски сметки од 12 до 15 отсто.
Зимно време, пак, околу 98 посто од домаќинствата ќе бидат во третиот блок, но ова би се случило само по актуелните цени, без пресметка на најавеното покачување.
Цените од блоковите ќе важат само за време на скапата тарифа. Евтината тарифа ќе биде еднакво висока за сите. Периодот на пресметка, пак, ќе остане 30 дена.
Нов изглед од следниот месец ќе имаат и сметките за струја каде точно ќе биде наведено која е цената на струјата и колкава е цената за користење на мрежата.
Новата цена на струјата ќе се знае в среда. Таа ќе зависи од тоа колкаво покачување на цената ќе побара ЕВН Хоум, откако ЕСМ понуди цена од 48 eвра за мегават час, а МЕПСО и електродистрибуција побараа зголемување од 60 до 80 отсто.
