![infektivno oddelenie kumanovo](https://i0.wp.com/netpress.com.mk/wp-content/uploads/2020/06/infektivno-oddelenie-kumanovo.jpg?resize=696%2C391&ssl=1)
Во изминатите 24 часа во ковид центрите во болниците низ земјава е пријавено дека се лекуваат 612 пациенти позитивни и суспектни на корона вирусот. Во регионалните центри во Битола и Штип се хоспитализирани дополнително 141 болен, со што вкупната бројка на пациенти позитивни и суспектни на Covid -19 вирусот кои болнички се лекуваат на инфективните одделенија е 753, соопшти во понеделникот Министерството за здравство.
Во болниците во внатрешноста има околу 130 слободни болнички кревети, а се прават и исписи на оздравени пациенти со што ќе се ослободат дополнителни легла.
По извештаите на болниците кои пристигнуваат во Министерството за здравство на дневна основа, во болницата во Битола се хоспитализирани 77 пациенти позитивни и суспектни на зараза со коронавирусот.
Во болницата во Штип пак е хоспитализиран 61 пациент. На инфективното одделение во Тетово има 47 пациенти, во Велес се лекуваат 66 болни, а во Куманово 73 пациенти позитивни и суспектни на Covid-19.
Во ковид центарот во Охрид има хоспитализирано 100 пациенти, во Прилеп 94, во ковид центарот во Гостивар 44, а во Струга 35 болни. Во болницата во Струмица лежат 70 пацинети, во Кочани 25, во Кичево 20, Кавадарци 33, а во Гевгелија 10 лица позитивни на коронавирусот.
Од министерството додаваат дека треба да се има предвид дека овие бројки се променливи и варираат од час во час, според направените приеми и исписи на пациенти.
Вкупната бројка пациети позитивни и суспектни на коронавирусот кои се лекуваат на инфективните оддели во главниот град и во болниците низ земјава е 1.212.
Инаку, сите одделенија на клиничките болници располагаат со болнички места до кои има довод на кислород, уверуват од министерството.
„И покрај големиот наплив на пациенти во изминативе десетина дена, Министерството за здравство е во постојан контакт со сите болници и доколку има потреба, капацитетите на ковид одделенијата ќе бидат дополнително проширени“, се додава во соопштението.