На инфективното одделение во Битола починаа тројца пациенти, најмладиот 35-годишен

Во последниве 24 часа на Инфективното одделение во Битола починаа тројца пациенти на возраст од 35, 55 и 73 години, од кои најмладиот побегнал од болницата па бил вратен во тешка состојна и подоцна починал.

Имено, починатите пациенти се од Битола и битолскиот регион, а со денешните тројца починати, вкупниот број на починати лица во Битола од почетокот на епидемијата изнесува 61 лице.

Синоќапочинатиот 35-годишен битолчанец претходно самоволно ја напуштил болницата и со свое возило си заминал дома, каде за да се одмори наводно се напил средства за смирување. Потоа не се будел, па семејството повикало Брза помош и бил вратен на болница каде се презеле сите мерки за да му се помогне, но пациентот починал.

 „Пациентот вчера предпладнето кога се делел ручекот избегал од ковид одделот каде и бил хоспитализиран. За бегството било известено болничкото обезбедување, МВР и директорот на Клиничката болница Битола, како и епидемиологот. Потоа, во 18:02 часот пациентот бил донесен со возило на Итна медицинска помош (ИМП) и медицинска екипа во вонредно тешка општа состојба, неконтактибилен, тахидиспноичен, хипотензичен со немерливи витални параметри, немерлива сатурација, со пена на устата и изразена цијаноза. Според кажувањата на медицинската екипа од ИМП, пациентот со приватно возило си отишол дома наводно да се наспие и одмори и се напил средства за спиење и смирување во непозната количина, веднаш заспал и не се будел, по што семејството повикало ИМП кои веднаш дошле во домот и ординирале терапија која немала ефект, по што е донесен на Инфективно одделение. Од страна на дежурната екипа на Ковид одделот биле преземени реанимациони мерки, но без поволен терапевтски одговор. Во 18:45 часот настапила смртта со клиничка слика на тешка кардиореспираторна инсуфициенција и престанок на работа на срцето. Во системот не постојат внесени коморбидитети“, соопшти Министерството за здравство.

Пациентот на 13-ти ноември се јавил во тријажна амбуланта, со симптоми на зголемена телесна температура и кашлица. Му била дадена терапија и дадена препорака за изолација и закажување тест преку матичен лекар. На 16-ти ноември повторно се јавил на преглед, дадена му е ампуларна тераппија, но поради прогресија на наодот, тешко дишење, температура, појава на бронхопневмонија бил хоспитализиран во ковид суспектни пациенти. На 17-ti ноември е земен брис и е добиен позитивен резултат на Covid-19.

 Од СВР Битола соопштија дека асистирале при враќањето на пациентот во болницата.

„Доктор се јави во СВР Битола и пријави дека вчера лице позитивно на Covid-19 избегало од установата. Тоа било пронајдено од полициски службеници и била поивикана Итна медицинска помош за да се транспортира назад на болница“, велат од СВР Битола.

Денешниот број на хоспитализирани пациенти во регионалниот ковид центар во Битола е 76.

Според вчерашниот извештај на министерството за здравство во Битола вчера беа регистрирани нови 51 заразени со Covid-19. Бројот на оздравени пациенти беше 28, додека пак бројот на активни случаи се искачи на 738.

ПОВРЗАНИ НАПИСИПОВЕЌЕ ОД АВТОРОТ