Косовски суд осуди во петокот осум мажи на вкупно 35 години и шест месеци затвор поради планирање напад врз тимот на израелската фудбалската репрезентација во Албанија, во текот на квалификациските натпревари за Светско првенство кој се одигра во 2016 година.
Осудените одделно добија од 18 месеци до 10 години затвор. Деветтиот обвинет во процесот доби парична казна од 2.500 евра. Според обвинителството, групата планирала напад врз израелскиот национален тим со експлозиви и со автоматски пушки. Планот бил спречен откако го разоткрила косовската полиција, за што ги информирала албанските власти, кои го преместија натпреварот од Скадар во Елбасан.
Обвинителството тврдеше дека некои од осудените добиле наредба да го извршат нападот од истакнатиот член на џихадистичката група Исламска држава и самопрогласен „командант на Албанците во Сирија и Ирак“, Лавдрим Мухаџери, за кој се тврди дека подоцна загинал на сириска територија.
