Најмалку осум лица загинаа, а илјадници се евакуирани од своите домови откако поројниот дожд го зафати северниот италијански регион Емилија Ромања, предизвикувајќи поплави и лизгање на земјиштето, соопштија властите во средата.
Министерот за цивилна заштита, Нело Мусумеци, рече дека во некои области имало половина од просечните годишни врнежи за само 36 часа, што предизвикало излевање на реките од коритата, поплавување на некои градови и илјадници хектари обработливо земјиште.
Големата награда на Формула 1 викендов во Имола, локација блиску до многу од најтешко погодените области, беше откажана во обид да се намали притисокот врз службите за итни случаи и да се спречат љубителите на трката да се соберат во погодениот регион.
„Се соочуваме со катастрофални настани кои веројатно никогаш досега не биле видени. Извонредни количества дожд падна на земјата, која повеќе не е во состојба да го апсорбира“, изјави за новинарите претседателот на регионот Емилија Ромања, Стефано Боначини.
Локалните власти соопштија дека поплавите зафатија 37 градови и општини и дека се регистрирани околу 120 свлечишта. Најмалку еден мост во близина на градот Болоња се урна, некои патишта беа оштетени, а многу железнички линии беа прекинати.
Осум тела се извлечени од различни локации, изјави за новинарите потпретседателката на Емилија-Ромања, Ирене Приоло, додавајќи дека иако дождовите стивнуваат, нивото на реките се уште расте.
Ова е вторпат овој месец Емилија Ромања да биде погодена од лоши временски услови, при што најмалку две лица загинаа за време на невремето на почетокот на мај.
Поплавите уследија по неколкумесечна суша што ја исуши земјата, намалувајќи ја нејзината способност да апсорбира вода и го влоши влијанието на поплавите, велат метеоролозите.
Калливата вода течеше низ историските центри Фаенца, Чезена и Форли, миејќи ги покривите на паркираните автомобили, потопувајќи некои продавници и принудувајќи ги локалните жители да побегнат до најгорните катови од своите домови.
Северниот град Равена, познат по ранохристијанските локалитети, исто така, беше тешко погоден.
„Ова беше веројатно најлошата ноќ во историјата на Ромања“, изјави градоначалникот на Равена Микеле де Паскале за јавното радио RIA, велејќи дека 5.000 луѓе биле евакуирани само од неговиот град во текот на ноќта.
Равена е непрепознатлива поради претрпената штета.
Министерот Мусумеци рече дека во некои делови од регионот за еден ден до ден и половина наврнале од 200 мм до 500 мм дожд, наспроти просечните годишни врнежи од 1.000 милиметри.
