Научниците за прв пат открија течна вода на Марс – длабоко во карпестата надворешна кора на планетата. Наодите се резултат на новата анализа на податоците од лендерот Mars Insight на НАСА, кој слета на планетата во 2018 година.
Лендерот носел сеизмометар кој регистрирал 4 години вибрации – потреси на Марс – од длабочината на Црвената планета.
Анализата на овие потреси откри сеизмички сигнали за присуство на течна вода. Со мерење на брзината на сеизмичките бранови, научниците открија низ кој материјал најверојатно ќе патуваат.
Иако има замрзната вода на половите на Марс и траги од пареа во атмосферата, на планетата за прв пат е откриена течна вода.
Наодите се објавени во Proceedings of the National Academy of Sciences.
„Тоа се всушност истите техники кои ги користиме за да бараме вода на Земјата или да бараме нафта и гас“, објаснува професорот Мајкл Манга од Универзитетот во Калифорнија, Беркли, кој учествувал во истражувањето.
Анализата открива резервоари со вода на длабочина од 10 до 20 километри во кората на Марс.
Професорот Манга додава дека водата е „најважната молекула во обликувањето на еволуцијата на планетата“.
Според него, ова откритие дава одговор на големото прашање – „Каде отиде целата вода на Марс?“.
Студиите на површината на Марс – со нејзините канали и бранови – покажуваат дека во античко време на планетата имало реки и езера. Но, три милијарди години тоа беше пустина.
Дел од оваа вода се изгуби во вселената кога Марс ја загуби атмосферата.
„Но, овде на Земјата, голем дел од нашата вода е под земја, и нема причина тоа да не се случи и на Марс“, додаде проф. Манга.
