По безредијата и насилствата изминатите години, како и поради тензијата во заедницата предизвикана од војната во Газа, берлинската полиција планира голема операција за новогодишната ноќ.
„Ова е најголемата полициска акција на новогодишната ноќ во последните неколку децении. Ова главно се должи на конфликтот на Блискиот исток, што ја прави оперативната ситуација многу попредизвиклива и сложена“, изјави за агенцијата DPA комесарката на берлинската полиција Барбара Словик.
Минатата година, покрај вообичаениот жесток огномет на улиците, имаше и многу фрлени петарди и други напади врз полицајци, пожарникари и болничари во некои области на Берлин и другите поголеми германски градови.
Словик најави дека за новогодишната ноќ ќе бидат распоредени 2.000 до 2.500 берлински полицајци од покраините Саксонија, Саксонија-Анхалт и од сојузната полиција.
„Истовремено, бројот на патролни возила во текот на ноќта ќе се зголеми од вообичаените 150 на 220“, додава Словик и наведува дека покрај тоа, 500 сојузни полицајци ќе бидат распоредени на приградските и меѓуградските железнички станици.
Една од причините за значителното зголемување на бројот на полицајците во германската пресолнина се настаните од минатата новогодишна ноќ.
„Ние значително ја зголемуваме заштитата на пожарникарите и другите лица кои први реагираат. Исто така, многу сме присутни на улиците во одредени населби“, рече Словик.
На ова се додава и високата емоционална состојба предизвикана од конфликтот на Блискиот исток. „Претпоставуваме дека овие емоции ќе се покажат и на улиците“, додава Словик за DPА.
