Недела е ден кога целото семејство се собира на ручек, нема доцнење поради работи или училиште. Затоа денеска на своите најмили подгответе им вкусен ручек, пилешко со сирење и домати и слатки фигаро колачиња.
Потребно:
4 компири, сечени на тенки кругови
2 лажички маслиново масло
2 лажички ситно рендана кора од лимон
2 лажици сок од лимон
100 г фета-сирење
1 лажица оригано
4 пилешки батаци со карабатаци
3 домати
100 г црни маслинки
Подготовка:
Загрејте ја рерната на 220 степени. На дното на голема тава за печење наредете ги парчињата компир во еден слој. Попрскајте ги со маслиновото масло. Зачинете ги со сол и црн пипер.
Измешајте ги лимоновата кора, сокот од лимон, сирењето и ориганото. Со прсти нежно поткревајте ја кожата од парчињата пилешко месо и под неа ставајте по 2 лажички од смесата со кора од лимон. Протријте ги парчињата пилешко за смесата да се распореди рамномерно. Наредете ги врз компирите и печете ги 30 минути.
Извадете ја тавата од рерна и додајте ги доматите и маслинките врз пилешкото. Зачинете со црн пипер. Печете уште 10 минути, или додека пилешкото да биде готово. Одозгора украсете со листови свежо оригано и послужете.
Фигаро колачиња, одлични за десерт во комбинација со кафе.
Потребно:
2 парчиња обланди
1 лимон
250 г. ореви
5 жолчки
500 г. Шеќер
250 г. путер
Подготовка:
Путерот стопете го на пареа. Додадете 250 г. шеќер, жолчките и оревите и промешајте. Потоа оваа смеса тргнете ја од оган.
Во друг сад стопете ги останатите 250 г. шеќер. Кога ќе пожолти додадете го во смесата и измешајте. Смесата рамномерно нанесете ја на едното парче обланда, потоа преклопете со другото и притиснете ја со нешто тешко. Оставете да се олади на собна температура и исечете на коцкички.
