Шефот за надворешна политика на Европската унија, Жозеп Борел, призна дека блокот ja нема потребната едногласност за воведување санкции на двајца екстремно десничарски израелски министри за „говор на омраза“ против Палестинците во Газа.
Борел им рече на новинарите во Брисел дека побарал од министрите за надворешни работи на ЕУ да размислат за воведување санкции за министерот за национална безбедност Итамар Бен Гвир и министерот за финансии Безалел Смотрич, но призна дека некои од блокот не се согласуваат со иницијативата.
„Министрите ќе одлучат. Од нив зависи, како и секогаш. Но, процесот е започнат“, рече тој, додавајќи дека санкциите ќе продолжат да се дебатираат.
Иако не именуваше ниту еден од израелските министри, Борел во последниве недели јавно ги обвини Бен Гвир и Смотрич за давање „злобни“ изјави кои претставуваат „поттикнување на воени злосторства“.
Борел рече дека предложил израелските министри да бидат санкционирани поради кршење на човековите права. Санкциите на ЕУ генерално значат забрана за патување во блокот и замрзнување на нивни имотот во ЕУ.
Дипломатите велат дека е малку веројатно ЕУ да го постигне потребниот едногласен договор меѓу своите 27 членки за воведување санкции на министрите во израелската влада. Сепак, земјите-членки можат да воведат санкции поединечно.
Одлуката на Борел да изнесе таков предлог укажува на нивото на гнев кај некои европски функционери поради зборовите и постапките на некои екстремно десничарски министри.
Дури и министрите од некои земји кои се силни сојузници на Израел, како Германија и Чешка, не ја затворија дискусијата за санкциите веднаш во коментарите за новинарите на маргините на состанокот во четвртокот.
Ирска, една од најпропалестинските членки на ЕУ, рече дека го поддржува предлогот на Борел.
„Ќе ја поддржиме препораката на Хозеп Борел за санкции во однос на доселеничките организации на Западниот Брег кои го олеснуваат проширувањето на населбите, а исто така и на израелските министри“, рече ирскиот министер за надворешни работи Мајкл Мартин.
Но, италијанскиот министер за надворешни работи Антонио Тајани ја отфрли идејата. „Мораме да ги решиме проблемите, да ги убедиме Израелците да направат избор што ќе доведе до прекин на огнот во Газа“, рече тој. „Ова е вистинскиот приоритет“.
Смотрич и Бен Гвир и двајцата се противат на договорот за заложници што ќе стави крај на војната која почна откако илјадници терористи предводени од Хамас упаднаа во јужен Израел, убија речиси 1.200 луѓе и земаа 251 заложник.
И двајцата министри дадоа контроверзни изјави за војната. Смотрич на 5 август посочи дека странските сили го спречуваат Израел да ги изгладнува жителите на Газа, иако тоа може да биде „оправдано и морално“; Бен Гвир ја повика владата да ја „охрабри емиграцијата“ од Газа и да ја насели со Евреи.
Според „Хаарец“, ниту една европска земја нема официјални односи ниту со Смотрич, ниту со Бен Гвир, што го отсликува бојкотот на Вашингтон на двајцата екстремно десничарски министри.
Белата куќа – која во средата ја издаде својата шеста серија санкции насочени кон насилството на доселениците на Западниот Брег – размислуваше да ги санкционира двајцата министри кон крајот на јули, но подоцна беше речено дека се повлекле од идејата.
