Официјален претставник на палестинската исламистичка организација Хамас во понеделникот за Reuters изјави дека нема напредок во новата рунда преговори за прекин на огнот во Појасот Газа, кои се одржуваат во египетската престолнина Каиро, а на кои учествуваат и делегации од Израел, Катар и САД.
„Нема промена во гледиштето на окупацијата и затоа нема ништо ново во преговорите во Каиро“, изјави претставник на Хамас за Ројтерс кој сакаше да остане анонимен. „Засега нема напредок“, додал тој.
Претходно во понеделникот, египетската телевизија al-Kahera News цитираше висок египетски извор кој рекол дека е постигнат напредок во разговорите откако учесниците постигнаа договор за прашањата за кои се разговара.
Израел и Хамас испратија претставници во Египет во неделата, откако шефот на американското разузнавање Вилијам Барнс пристигна таму во саботата, чие присуство го нагласи притисокот на Вашингтон да обезбеди договор за ослободување на заложниците држени во Газа и олеснување на хуманитарната криза таму.
Израел и Хамас, кои од октомври војуваат во Појасот Газа, досега не успеаја да ги решат разликите во однос на нивните главни барања.
Хамас сака крај на израелската офанзива и целосно повлекување на силите на Тел Авив од неговата опустошена територија, додека Израел бара договор за ослободување на заложниците од Газа во замена за многуте Палестинци во затвор, но без обврска за завршување на војната.
