Државната награда „Мито Хаџи Василев-Јасмин“ за остварувања во областа на публицистиката денеска во Собранието му беше доделена на Ненад Георгиевски, а за остварување во новинарството на Мијалче-Мишко Иванов.
Претседател на Одборот за доделување на наградата е Зоран Бојаровски.
Ненад Георгиевски посочи оти му е чест и задоволство да ја добие оваа награда и потенцираше дека и во иднина ќе продолжи со заложбите да даде свој придонес кон културата и општеството и се она што го гледа надвор од државата, ќе биде убаво презентирано тука.
-Се надевам дека оваа награда ќе биде потврдена со нови изданија, нови книги и нови достигнувања, рече тој.
Мишко Иванов по добивањето на наградата потсети дека оваа година одбележува 10 години од неговата емисија „Патот до успехот“ но и 25 години како чекори по патот на новинарството.
Тој додаде дека посакува нашата држава да ја види на патот до успехот, да направи емисија во која напата држава ќе е успешна земја.
-Живеам за денот, го чекам денот кога ќе направам „Патот до успехот“, во која Македонија ќе биде слободна и без притисоци, во која нема да биде забранета слободата на изразувањето и известувањето. Да ја направиме Македонија држава во која нема да има завидливи луѓе, туку луѓе кои ќе гледаат напред и ќе се врати вистинскиот систем на вредности, рече Иванов.
Мито Хаџи Василев-Јасмин е наречен „прво перо“ на македонското новинарство и публицистика, а бил и првиот претседател на Здружението на новинарите на Македонија.
Оваа наградата за првпат е доделена во 1969 година.
Фото: Фејсбук
