Ирскиот премиер Лео Варадкар во средата објави дека се повлекува од функцијата премиер и лидер на владејачката партија Фин Гаел од лични и политички причини.
„Денеска поднесувам оставка како претседател и лидер на партијата Фин Гаел и ќе поднесам оставка од функцијата премиер штом мојот наследник ќе ја преземе функцијата“, изјави Варадкар на новинарите собрани пред владините згради во Даблин.
Заминувањето на Варадкар од водството на трипартиската коалиција нема автоматски да доведе до избори.
Тој рече дека побарал новиот претседател на партијата да биде избран на 6-ти април, за да се овозможи избор на нов премиер по враќањето на парламентот од велигденските празници.
Во емотивниот говор, Варадкар рече дека е вистинското време да се повлече и дека нема „вистинска причина“ зад неговата одлука. „Немам ништо друго планирано, немам ништо на ум. Немам конкретни лични или политички планови“, рече тој.
Во 2017 година, Варадкар стана првиот хомосексуален премиер на некогаш цврсто католичката земја и најмладата личност на оваа функција. Се врати на премиерската функција во 2022 година според договорот за ротација меѓу Фин Гаел и Фиана Фаил, најголемите партии во трипартиската коалиција со помалата Зелена партија.
Следните избори треба да се одржат на почетокот на 2025 година.
Кандидати да го наследат Варадкар како лидер на партијата Фин Гаел се министерот за високо образование Сајмон Харис, кој беше министер за здравство за време на пандемијата ковид-19, министерот за претприемништво Сајмон Ковени, министерот за јавни расходи Пашал Донохју и министерот за правда Хелен Мекенти.
