Полицијата трага по А.К.(53) од Мала Речица, кој вчера со пиштол ја убил својата сопруга Х.К.(52) пред нејзината куќа во Мала Речица. Од Основното јавно обвинителство Тетово велат дека е извршен увид, но мотивот за злосторството се уште се истражува.
Надлежен јавен обвинител издаде наредба за обдукција на починатата, како и наредби за прибирање и за вештачење на траги и материјални докази пронајдени на лице место, велат од ОЈО.
Според полицијата, убиството се случило околу 22.35 часот на улица Љуботенска во Мала Речица, кога А.К.ја застрелал сопругата.
Подоцна, А.К. пукал и во возило „Голф“ со тетовски регистарски ознаки, во кое бил сопственикот Р.Џ.(50), а кое било паркирано на улица 179 во Мала Речица, но не го повредил. Потоа А.К. побегнал со своето возило. Увид на местото извршиле Јавен обвинител и увидна екипа на СВР Тетово. На двете места каде е пукано биле пронајдени и подигнати по две чаури калибар 7,62 милиметри. По Наредба на Јавен обвинител телото на починатата било предадено на обдукција. Се преземаат мерки за пронаоѓање на А.К. и за целосно расчистување на случајот, велат од МВР.
