Голем шумски пожар избувна во текот на ноќта на грчкиот остров Евија, а превентивно биле евакуирани две села, јави дописничката на МИА од Атина.
Пожарот е во општина Каристос во југозападниот дел на островот, а градоначалникот Елефтериос Равиолос за државната телевизија „ЕРТ” рече дека иако утрово ситуацијата е подобрена, сепак постои страв за разгорување поради ветерот што е со јачина од седум до осум Бофора.
Силниот ветер дополнително ја отежнува работата на пожарникарите, а според грчките медиуми, иако рано утрово се интервенираше и од воздух, поради ветерот, хеликоптерите не може да летаат.
Според противпожарната служба на Грција, пожарот го гаснат 46 пожарникари со 20 возила, еден пешадиски тим и пет хеликоптери, од кои еден е за координација.
Прекинат е поморскиот сообраќај меѓу Атина и Евија, а според грчката новинска агенција АНА-МПА, од Министерството за поморство во состојба на готовност се бродови во случај да е потребна евакуација на жителите.
Причините за пожарот во Грција се уште не се официјално утврдени, но десетици луѓе се уапсени под сомнение дека го подметнале пожарот, меѓу кои и 14-годишно момче.
