Нов Закон за сметководствени работи, којшто ќе биде во согласност со директивите на ЕУ и со европските практики во насока на унапредување на сметководствената професија, се изготвува во соработка со стопанските комори, информира денеска Министерството за финансии.
Новиот закон ќе треба да придонесе за одржлив развој и саморегулација на сметководствената професија, воспоставување и спроведување професионални стандарди и заштита на јавниот интерес.
– Верувам дека целта ни е единствена, односно, во еден заеднички процес на соработка да ги утврдиме решенијата што ќе бидат во интерес на сите ваши колеги, на оние што сакаат или ќе сакаат да се занимаваат со оваа професија, како и во интерес на сите оние што ги користат сметководствените услуги. Притоа, имаме обврска решенијата да бидат во согласност со единствените европски правила во однос на давањето услуги и меѓународно прифатените стандарди во оваа област. Со новиот закон потребно е да се обезбеди слободен влез во сметководствената професија – изјави министерот за финансии Фатмир Бесими на денешната средба со сметководителите
Бесими рече и дека е потребно континуирано да се унапредува процесот на професионално усовршување, согласно со меѓународно прифатените стандарди, и да се овозможи поголема инклузивност и транспарентност во работењето на Институтот за сметководители и овластени сметководители.
– Со новите одредби, Институтот ќе започне и во континуитет ќе има обврска да ги преведува меѓународите стандарди за финансиско известување и ќе ги воспостави потребните стандарди за влез на Институтот во ИФАК (IFAC) – нагласи тој.
Нацрт-законот, како што информира министерот, ќе биде доставен до коморите во текот на следната недела, при што ќе се очекуваат коментари и предлози од страна на коморите до крајот на март пред истиот да биде објавен на ЕНЕР.
