Новиот премиер на Црна Гора, Дритан Абазовиќ, изјави дека се залага за регионалната иницијатива „Отворен Балкан“.
Тој за приштинската телевизија „Клан Косово“ изјави дека „Отворен Балкан“ е осмислен да опфати шест земји од Западен Балкан и оцени дека Косово би имало најголема корист од учеството во иницијативата.
„’Отворен Балкан‘ е направен за шест земји, не е направен за пет и пол земји или три и пол земји, туку за шест земји. Секој што учествува се претставува себеси и својата земја. Мое мислење, можеби грешам, е дека најголем интерес во регионот е Косово да биде во која било регионална иницијатива“, рече Абазовиќ.
Властите во Приштина и Подгорица досега одбиваа да учествуваат во „Отворен Балкан“, додека во Босна и Херцеговина не беше постигнат консензус за приклучување кон иницијативата, која ги вклучува Србија, Албанија и Северна Македонија.
Црногорскиот премиер ги потврди и тврдењата дека „Отворен Балкан“ е иницијатива на српскиот претседател за создавање голема Србија велејќи дека тоа нема смисла со оглед дека во проектот учествува и Албанија.
„Најважно е да се зголеми довербата меѓу државите во регионот и да се случи тоа мора да има и комуникација, а тоа се случува само двапати годишно – во Берлин и Виена, каде што се сретнавме со премиерите минатиот јуни, каде што се разговара и се пие кафе и потоа никој повеќе не контактира со никого. Мислам дека тоа е погрешен начин. Не знам кој е тој што сака да чека на граници, не зборувам само за туристите од Косово во Црна Гора туку и за граѓаните на Црна Гора кои сакаат да одат во Србија или каде било во регионот“, рече Абазовиќ.
