Министерот за животна средина и просторно планирање Насер Нуредини заедно со директорот на Дирекцијата за заштита и спасување Беким Максути ја посети обуката за справување со пожари на отворен простор за просторните сили на Шар Планина, што вчера и денес се реализира во организација на ЈУНП Шар Планина, со поддршка на Дирекцијата за заштита и спасување и противпожарната единца од Тетово.
Со обуката беа опфатени повеќе од 30 волонтери од граѓанското здружение за унапредување мерки за заштита од пожари „ДОБРОВОЛНО ПОЖАРНИКАРСТВО“ Тетово, а беа присутни и учесници од сите седум општини на територија на новиот национален парк, соопштија од МЖСП.
„Оваа обука се одржува во вистинско време, во пресрет на високите температури и опасноста од пожари. Ја поздравувам активноста на Управата на новиот национален парк Шар Планина и ме радува што гледам дека грижата за природното богатство на оваа наша планина предизвика ваков интерес и подготвеност за вклучување во нејзината заштита од волонтери од сите општини што се дел од ова заштитено подрачје“, истакна Нуредини.
Зајакнувањето на граѓанскиот сектор во доброволното гаснење на пожари опфати теми како вовед во системот за заштита и спасување, права и обврски на институциите во системот за заштита и спасување од пожари со практична употреба на ПП апарати и хидрантската мрежа, прва медицинска помош, мерки за заштита и спасување, евакуација и згрижување на загрозеното население, лична и колективна заштитна опрема, тактика и техники на гаснење на шумски пожари на отворен простор, штети на шумите од пожар и заштита на шумите. Практичниот дел опфаќа употреба на гребли, ПП метли, напртњачи, воздушни дувалки и моторни грбни пумпи за вода.
На настанот, директорот на Дирекцијата за заштита и спасување Беким Максути предаде 10 пара заштитни комбинизони за интервенција на отворен простор од страна на ДЗС за потребите на националниот парк.
Директорот на ЈУНП Шар Планина Ибрахим Дехари, упати апел до локални жители и љубители на природата да се однесуваат одговорно при посета на националниот парк со оглед на постоечкиот ризик од појава на пожари и фактот дека во моментот во ЈУНП Шар Планина нема иницијатива за рестриктирање на движењето во шума.
Реализацијата на обуката беше овозможена со поддршка на Светскиот фонд за природа (WWF Adria), Центарот за едукација и развој од Теарце (CED), Шведската агенција за развој и соработка (SIDA).
