Основното јавно обвинителство за гонење на организиран криминал и корупција ја презема истрагата за малверзации во изградба на пешачкиот мост „Мост око”, а за кои Управата за финансиска полиција поднесе кривична пријава против три лица, меѓу кои и ексградоначалникот на Општина Центар, Владимир Тодоровиќ, осомничени дека го оштетиле општинскиот буџет за над 433.000 евра.
Надлежен јавен обвинител од Основното јавно обвинителство за гонење на организиран криминал и корупција, по добивање на предметот од Основното јавно обвинителство- Скопје, донесе Наредба за спроведување на истражна постапка против три лица за кои постои основано сомнение дека сториле кривично дело злоупотреба на службена положба и овластување од чл.353 ст.5 во врска со чл.22 од Кривичниот законик.Осомничените, во периодот од 2009 до 2012 година при спроведување на постапка за јавни набавки со неизвршување на својата службена должност овозможиле изведувачот на проектот-Изградба на пешачки мост „Мост око” на реката Вардар, да се стекне со имотна корист во износ од 26.653.424 денари. Имено, по склучување на договорот во висина од 92.546.647,00 денари за јавна набавка на работи – изградба на пешачки мост од страна на Општина Центар како инвеститор од една и изведувачот на градежните работи од друга страна, склучен е и Анекс на договорот за јавна набавка со што вредноста на договорот се зголемила на износ од 119.197.783 денари, велат од ОЈО.
Според ОЈО, првоосомичениот како извршен орган на општината и потписник на Договорот за јавни набавки и Анекс договорот за јавна набавка, заедно со второосомничениот, како потписник на барањата за исплата кој имал обврска да ја проверува документацијата и со тоа да го следи степенот на реализација на проектот и третоосомничениот како овластено одговорно лице за следење на текот на изведбата на проектот согласно договорот, не ги запазиле законските одредби од чл.48 ст.5 и 6 од Законот за јавни набавки.
Осомничените согласно своите надлежности не презеле активности за активирање и наплата на банкарските гаранции депонирани во деловните банки од страна на изведувачот, ниту побарале продолжување на рокот на важност на гаранциите во износ од 8.773.714 денари за дадените аванси. Воедно, првоосомничениот согласно склучениот Анекс договор, иако бил обврзан, не го продолжил рокот на важност на банкарската гаранција за навремено и квалитетно извршување на работите во износ од 17.879.710 денари, а која гаранција по раскинување на договорот требало да ја активира и наплати во корист на Општина Центар, велат од ОЈО.
Освен против Тодоровиќ, пријавата е поднесена и против М.Т., поранешен секретар во Општина Центар, и Д.Р. вработен во секторот за градежно уредување, а фирмата е „Конструктор-Инжинеринг АД за градежништво Сплит“.
По поднесување на кривичната пријава во јули годинава од Управата за финансиска полиција рекоа дека тројцата осомничени се согласија да ја надоместат штетата и ги вратиле парите кои веќе се уплатени на сметката на општина Центар.
