Основното јавно обвинителство Гостивар донесе Наредба за спроведување истражна постапка против три лица под сомнение дека биле инволвирани во убиство на тричлено семејство во Дебар. Како што е познато на јавноста, за убиството на семејството Поцеста е осомничена нивната ќерка Блерта, како и гостиварецот Ферди Гаши и дебранинот Веап Клопочишта, кои и помогнале во злосторството.
Првоосомничената, жена на возраст од 28 години, е под истрага бидејќи постојат основи на сомнение дека сторила кривично дело – Убиство од чл.123 ст.3 од Кривичниот законик. За другите двајца осомничени, 31-годишен маж од Гостивар и 62-годишен жител на Дебар, постои сомнение дека и помагале во извршувањето со што сториле кривично дело – Убиство од чл.123 ст.3 во врска со чл.24 од Кривичниот законик. Ценејќи дека се исполнети законските услови, надлежен јавен обвинител до судија на претходна постапка достави Предлог за определување мерка притвор за сите три осомничени лица. Ваквиот предлог беше прифатен и судијата на осомничените им одреди мерка притвор во траење од 30 дена.Истражната постапка продолжува во насока на целосно расветлување на овој настан и обезбедување материјални докази, велат од ОЈО.
Мотивот за убиството не е познат, иако се шпекулира дека Блерта во полицијата рекла дека родителите не и дозволувале да се омажи за Италијанец, додека според друга верзија, во прашање е животно осигурување во висина од 500.000 евра, кое ќерката требало даги добие.