Како што објавија американските медиуми во саботата, првиот тенисер од АТП ранг листата, Србинот Новак Ѓоковиќ, нема да може да игра на претстојните турнири во Индијан Велс и Мајами.
Поради тоа што не бил вакциниран против коронавирусот, Ѓоковиќ мораше да ја достави соодветната документација и да напише барање за да добие посебна дозвола за влез во САД. Сепак, се чини дека барањето на Ѓоковиќ било одбиено, а тоа го потврди и сенаторот од Флорида, Рик Скот.
„Добивме информација дека барањето на Ѓоковиќ да влезе во нашата земја е одбиено. Сепак, веруваме дека таквата одлука сепак може да се промени“, изјави Скот.
Но додека отсуството од турнирите во Индијан Велс и Мајами, кои се одржуваат во текот на март, Ѓоковиќ некако би и го пребродел, потенцијалниот настап на УС Опен, грен-слем турнирот во Њујорк, кој се одржува од 28-ми август до 10-ти септември му е многу поважен. Дотогаш, сепак, останува уште многу време за промена на моменталната негативна ситуација за тенисерот кој исто како и Рафаел Надал досега има освоено 22 грен-слем титули во текот на кариерата.
