Подготовките за претседателските, но и за парламентарните избори се интензивни од страна на учесниците на изборите, но и од Државната изборна комисија (ДИК). На 18 март завршува увидот во Избирачкиот список и за претседателските и за парламентарните избори, кога завршува и рокот за гласање во дијаспората.
Листите на кандидати за претседател овластените претставници на предлагачите ги доставуваат до ДИК најдоцна на 19 март до 24:00 часот.
Од ДИК информираат дека дека заклучно со 11 март, вкупно 3 994 лица направиле проверка во Избирачкиот список во подрачните единици и канцеларии, шест лица барале промена на податоците, девет барале запишување на своите податоци во Избирачкиот список, а пет бришење.
Проверката граѓаните ја прават и електронски преку веб страната на ДИК каде исто така можат да поднесат и барања. Па, така до 11 март 21 лице поднело барање за промена на податоци по електронски пат, од кои три лица побарале бришење на податоците, а седум запишување во Избирачкиот список.
Според информациите од Апликација на ДИК за регистрација на гласачи од дијаспора (sec.mk) утрово таа бројка изнесува 1010 пријавени, од кои прифатени се 617, необработени се 278 и одбиени се 115.
Потребните потписи за претседател ги собраа актуелниот претседател Стево Пендаровски, Гордана Силјановска Давкова од ВМРО-ДПМНЕ, Бујар Османи од ДУИ, Арбен Таравари од албанската опозициска коалиција Вреди, кандидатот на ГРОМ Стевчо Јакимовски, Максим Димитриевски од ЗНАМ-За наша Македонија и Билјана Ванковска Цветковска од Левица.
