ОКТА продолжува со реализација на својата долгорочна општественоодговорна платформа „ЈАС ВНИМАВАМ“, како јасен показател за посветеноста на компанијата за зголемување на јавната свест за поголема безбедност во сообраќајот. Дел од годинешните активности предвидени со платформата ќе се реализираат во соработка со Републичкиот советза безбедност на сообраќајот на патиштата (РСБСП), а се опфатени во новиот Меморандум за соработка, со кој во следните три години се продолжува партнерството на ОКТА со оваа институција.
„Безбедноста во сообраќајот останува еден од клучните столбови на корпоративната стратегија за општествена одговорност на ОКТА. Преку платформата ЈАС ВНИМАВАМ, веќе седум години во континуитет спроведуваме различни активности за поддршка и едукација на сите учесници во сообраќајот, со цел да поттикнеме поголема колективна свест и индивидуална одговорност. За успехот на оваа мисија од големо значење се партнерствата со останатите чинители, меѓу кои секако е и Републичкиот совет за безбедност на сообраќајот на патиштата, затоа што за создавањето одржлива сообраќајна култура неопходен е континуиран
и заеднички напор“, истакна Марија Ставрева, менаџер за корпоративна општествена одговорност во ОКТА.
Едукативни работилници во неколку основни училишта наменети за најмладите учесници во сообраќајот, како и спроведување на едукативна онлајн кампања за пошироката јавност насловена „Каде брзаш?“, се дел од заедничките активности кои ОКТА и РСБСП, со поддршка на МВР, ќе ги реализираат во текот на октомври и ноември оваа година.
„Платформата на ОКТА за подигнување на свеста за безбедност во сообраќајот е вистински пример за тоа како може и треба да се придонесува за остварување на целите кои се во интерес на сите граѓани и на целото општествено, затоа што сите ние сме на некој начин учесници во сообраќајот и посакуваме намалување на сообраќајните несреќи и побезбедни патишта. Како iнституција чиј главен фокус е безбедноста во сообраќајот и на патиштата, со ОКТА ги споделуваме истите заложби и цели што се потврдува и со овој наш меѓусебен Меморандум за соработка“, рече Гордана Кожуваровска, претседателка на Републичкиот
совет за безбедност на сообраќајот на патиштата.
Во рамки на платформата „ЈАС ВНИМАВАМ“ планирани се и други активности кои ќе бидат реализирани од ОКТА во следниот период. Една од нив е донација на нови фотоволтаични знаци кои треба да се постават на пешачките премини на неколку фреквентни сообраќајници во близина на основните училишта во центарот на главниот град.
Во 2017 година ОКТА започна со спроведување на активности во рамки на платформата „ЈАС ВНИМАВАМ” преку која досега има реализирано различни иницијативи, донации и креирано бројни едукативни содржини со цел да придонесе за поттикнување повисока свест и разбирање за потребата од зголемување на личната и безбедноста на сите учесници во сообраќајот. Истата година, оваа платформа ја доби и наградата за најдобра национална општествено одговорна практика.
Повеќе информации за досега спроведените активности од платформата „ЈАС ВНИМАВАМ“ може да најдете на веб-страницата на ОКТА.
ОКТА АД – Скопје е најголемиот снабдувач на гориво во земјата, обезбедувајќи го пазарот совисококвалитетни производи кои ги задоволуваат последните локални и европски стандарди.Основана во 1978 година, компанијата е предводник во областа на трговија, снабдување и дистрибуција на нафтени деривати во регионот. Како членка на HELLENiQ ENERGY – една од водечките енергетски групации во Југоисточна Европа, ОКТА постојано воведува меѓународни вештини, иновативни решенија и врвни технолошки трендови во секојдневното работење.
Преку своите активности во големопродажбата, ОКТА опслужува големо портфолио на клиенти во земјата и во регионот, од мали претпријатија до големи индустриски капацитети и владини институции. Благодарение на долгогодишното искуство и лидерство на пазарот, компанијата има развиено врвен логистички систем кој овозможува брзо и сигурно снабдување на клиентите со гориво.
Малопродажната мрежа на ОКТА се состои од модерни бензински станици распространети низ целата земја, кои нудат висококвалитетни производи и услуги за крајните корисници. Во 2018 година, како компанија насочена кон иновации, ОКТА го прошири своето портфолио со производство, снабдување и управување со електрична енергија од обновливи извори.
Поставувајќи ја безбедноста како врвен приоритет, компанијата е посветена да ја врши својата дејност однесувајќи се етички и одговорно кон општеството и животната средина.
