Високиот комесар за човекови права при Обединетите нации денеска ја повика талибанската влада во Авганистан да ослободи пет лица за кои ОН соопштија дека биле приведени за време на прес-конференција закажана од група за правата на жените.
Полицијата вчера ја прекина прес-конференцијата во Кабул за да го објави почетокот на движењето наречено Движење на авганистанските жени за еднаквост, соопшти канцеларијата за човекови права на ОН.
За време на прес-конференцијата беа уапсени активистката Зарифа Јакоби и четворица нејзини колеги. И други жени во салата беа приведени, но подоцна ослободени откако полицијата им ги одзеде телефоните и темелно ги претресуваше.
– Загрижени сме за петмината уапсени и побаравме информации за нивното притворање од оние кои се де факто власт во Авганистан, изјави портпаролот на Високиот комесаријат на ОН за човекови права, Волкер Турк.
Портпаролот на талибанците изјави дека во моментов не може да коментира за случајот, но додаде дека ќе ја провери ситуацијата.
Групите за заштита на човековите права велат дека слободата на жените во Авганистан е ограничена откако талибанците ја презедоа власта во август минатата година, откако меѓународните сили кои ја поддржуваа прозападната влада се повлекоа од Кабул. Ограничувањата се однесуваат на нивната облека, нивното движење и нивниот пристап до образование, иако талибанците ветија дека нема да ги нарушуваат слободите на жените.
