-Реализиравме 70 проценти за една година од она што сме го ветиле дека ќе го реализираме за 4 години, вели Орце Ѓорѓиевски, градоначалник на општина Кисела Вода во гостување во емисијата „Што не е јасно“ на телевизија Алфа, и потенцираше дека преку работа мора да ја оправда довербата и поддршката која што ја добил од граѓаните на локалните избори.
-Јас сум добил поддршка од народот и морам да ја оправдам нивната доверба и морам да им бидам на моите сограѓани потпора. Не смеам да си дозволам да оставам дечиња да не се хранат во школо, граѓаните да смрзнуваат преку зима, знам дека не е популарна мерката субвенција на дрва, дека загадуваат и сум свесен за истото, но јас не може да ги оставам граѓаните да смрзнуваат и токму затоа го направивме целиот овој сет на мерки. За прв пат во општина Кисела Вода секое прваче доби ранец со опрема, можеби не е многу, но со оглед на економската ситуација каква е, значајна е и мала помош за граѓаните, додаде тој.
-Да сте градоначалник не значи само да ги решавате инфраструктурните проблеми, не значи само имате организација на настани, многу значи кога ќе успеете стандардот на своите граѓани, освен преку привлекување на инвестиции и нови работни места, и на ваков начин, социјално да го помогнете, рече Ѓорѓиевски.
Во однос на обвинувањата од страна на СДСМ дека ништо не е сработено во Кисела Вода, Ѓорѓиевски нагласи дека не гледа опрвданост и здрава логика во ваквите изјави, како и дека доколку СДСМ се фокусираше на решавање на проблемите на граѓаните, немаше сега државата да е во ваква катастрофална состојба.
-Не гледам оправданост во тие изјави, ниту пак вистини или здрава логика. За жал, се фокусираат на се друго, освен на реализација на проекти односно на она за што тие биле избрани и им била дадена шанса од нашите граѓани. Доколку помалку се занимаваа со вакви приказни и сценарија кои ги прават, претпоставувам во некој подрум на Бихаќка, а многу повеќе ставеа акцент и фокус на проблемите на граѓаните и државата во целост, мислам дека ќе бевме многу подобро држава денес, а не да се наоѓаме во состојба во каква што се наоѓаме, дециден е Ѓорѓиевски.
