Градоначалникот на Општина Штип, Иван Јорданов, денеска традиционално на првиот ден во новата година ги посети најстарите жители, браќата Наскови, кои заедно имаат 206 години.
-Прекрасно е чувството кога ќе се поразговара со семејствата на нашите највозрасни жители, а кои ни прераскажуваат за најстарите и највозрасните штипјани кои поминале многу предизвици, вели Јорданов.
Ристо Насков во февруари ќе наполни 101 година, се уште се движи низ дворот и градината, но со помош на бастун. Неговиот син Димче Насков вели дека дедо Ристо и оваа година крои планови да копа и произведува домати и пипер во градината.
Неговиот постар брат Симеон не е активен, откако пред две години паднал додека копал во градината. Грижата за него ја има неговиот 72-годишен син Крум Насков, кој секојдневно го посетува, му носи храна и се грижи за него.
-Татко ми може да стане и да си земе од масата јадење и повторно да седне на креветот, меѓутоа нозете не го држат и повеќе е во лежечка состојба. Веќе не може да работи, вели Насков.
Овие двајца браќа сведоци биле на војни, но и на убави работи кои се случувале во државата и во нивните семејства.
Горди се на своите наследници и веќе имаат и пра-пра внуци.
Градоначалникот на Општина Штип Иван Јорданов денеска ја посети и првата приватна гинеколошка болница во Штип, каде во новата година се роди живо и здраво женско бебе.
