Во дербито од -то коло од англиското фудбалско првенство Манчестер Јунајтед на својот „Олд Трафорд“ го победи Тотенхем со 2:0.
„Црвените ѓаволи“ славеа со двата погодока, но фактот дека најдобар поединец на мечот беше гостинскиот голман Уго Љорис, најдобро го отсликува она што се случуваше на теренот.
Манчестер Јунајтед апсолутно доминираа и вистинско чудо е што Тотенхем не доживеа поубедлив пораз. Јунајтед во текот на дуелот имаше дури 28 шута на гостинскиот гол, постигна два гола а уште еден му беше поништен поради офсајд, а домашните еднаш ја погодија и стативата.
Јунајтед поведе во втората минута од второто полувреме, кога шутираше Фред а топката погоди некој од одбраната на Тотенхем и го промени правецот измамувајќи го Љорис. Во 69 минута погоди и Бруно Фернандеш со убав удар од работ на шеснаесетникот. Португалецот погоди и во 82 минута, но голот беше поништен поради недозволена позиција.
Тотенхем остана на третото место со 23 бодови, а Манчестер Јунајтед моментално е петти на табелата со 19 бодови.
Во средата беа одиграни уште четири натпревари од кои три завршија со резултат 1:0, а еден без голови.
Ливерпул минимално го победи Вест Хем со голот на Дарвин Нуњез во 22 минута. Константинос Цимикас испрати добра топка во шеснаесетникот а Нињез со глава ја погоди десната страна од противничкиот гол. Нуњез можеше да постигне уште еден погодок, но ја погоди левата статива. Во самата завршница на првиот дел гостите можеа да израмнат, но Џерод Боуен не реализираше пенал. Шутираше во левата страна, но Алисон одлично одбрани.
Ливерпул моментално е седми со 16 бодови, а Вест Хем е 13-ти со 11 бодови.
Со идентичен резултат Њукасл го порази Евертон, а решавачки гол го постигна Мигуел Алмирон во 31 минута, Њукасл сега е шести со 18 бодови, а Евертон е 15-ти со 10 бодови.
Саутемптон на гостувањето славеше против Борнмут со голот на Чи Адамс во 9 минута. Борнмут остана 11-ти со 13 бодови, а Саутемптон се искачи моментално на 14-то место со 11 бодови.
Единствениот натпревар вечерва кој заврши без голови беше дуелот меѓу Бренфорд, кој е 9-ти со 14 бодови и Челзи кој остана моментално четврти со 20 бодови.
На врвот се Арсенал со 27 и Манчестер Сити со 23 бодови.
Во четврток на распоредот се дуелите Фулам – Астон Вила и Лестер Сити – Лидс Јунајтед, додека одложено е дербито меѓу Арсенал и Манчестер Сити.
