Иницијативниот одбор на Здружението на оштетени штедачи од Еуростандард Банка соопшти дека одржале состаноци со сите пратенички групи во Собранието за поддршка во изнаоѓање на итно, изводливо и ефикасно решение за оштетените физички и правни лица.
Оштетените штедачи бараат итно носење на законско решение со кое државата ќе ги преземе побарувањата на физичките и на правни лица, депоненти во Еуростандард Банка, и во целост ќе ги обештети, а потоа државата да наплати од стечајната маса.
– За ова наше барање, Здружението претходно доби поддршка и од Владата на состанокот со премиерот Зоран Заев и вицепремиерот Фатмир Битиќи на кој беше искажана волја за наоѓање на решение на проблемот. Пратеничките групи на СДСМ, на ВМРО-ДПМНЕ, на ДУИ, на Алијанса за Албанците, на Алтернатива и на Левицам дадоа целосна поддршка за носење на законско решение во најскоро време со кое ќе се изврши целосно парично обештетување на физичките и правни лица депоненти од Еуростандард Банка, се наведува во соопштението од Здружението на оштетени штедачи од Еуростандард Банка.
