Во текото на работната посета на Виена во четвртокот министерот за надворешни работи Бујар Османи оствари билатерална средба со австрискиот сојузен министер за европски и меѓународни работи Александер Шаленберг.
На средбата беше изразено задоволство од развојот на билатералните односи меѓу двете земји како и заемните заложби за натамошно зацврстување на пријателските и силни врски со акцент на економијата како еден од столбовите на односите на нашите две земји, изразувајќи надеж дека Австрија ќе продолжи и во иднина да претставува еден од најзначајните странски инвеститори во нашата земја.
Османи упатувајќи благодарност за силната и конзистентна австриска поддршка на европските интеграции на нашата земја, информираше за најновите внатрешно политички состојби во Македонија, како и за претстојните активности кои нашата земја треба да ги преземе во светло на процесот на пристапни преговори со Европската унија.
Шаленберг изрази големо задоволство од отпочнатите преговори и ангажманот на Македонија за деблокирање на процесот, упатувајќи порака дека неговата земја останува силен поборник за членство на сите земји од западен Балкан во Европската унија.
Беа разменети мислења и за руската инвазија врз Украина, заемно осудувајќи ги руските воени дејствија. Во овој контекст, министерот Османи истакна дека Македонија останува конструктивен партнер на ЕУ во одговор на кризата.
На средбата се дискутираше и за унапредување на мултилатералната соработка, со посебен акцент на претстојното претседавање на нашата земја со ОБСЕ во 2023 година.
