Премиерот Христијан Мицкоски, министерот за здравство Арбен Таравари и директорката на Клиниката за психијатрија, Славица Арсова, денеска свечено го отворија комплетно реновираниот дел на Универзитетската клиника за психијатрија. Оваа реконструкција е дел од напорите на Владата да создаде современи услови за третман и едукација во јавното здравство.
Министерот за здравство Арбен Таравари изрази задоволство од резултатите, истакнувајќи дека ова е втора универзитетска клиника која што Владата ја реновира во последните шест месеци.
„За шест месеци ова е втора Универзитетска клиника што ја промовираме со услови можеби подостоинствени за нашите пациенти отколку приватните клиники во државата. Очекуваме до крајот на јануари да промовираме и други проекти, како Ургентниот интернистички центар на токсикологија и Клиниката за урологија,“ изјави Таравари.
Тој нагласи дека приоритет на Министерството за здравство е да се обезбедат достојни здравствени услуги за сите граѓани во јавните здравствени установи.
Директорката на Клиниката, Славица Арсова, истакна дека новите услови ќе овозможат квалитетна здравствена заштита за пациентите, додавајќи дека едукацијата и превенцијата се клучни аспекти на работата на Клиниката.
„Без квалитетни, безбедни и пријатни услови за работа на здравствениот персонал, не можеме да очекуваме квалитетна заштита. Нашата Клиника ќе продолжи да ги едуцира новите кадри и да ги подобрува здравствените услуги,“ рече Арсова.
Премиерот Христијан Мицкоски ја истакна важноста од создавање пристојни услови и мотивиран медицински персонал. Тој изрази надеж дека колективните договори ќе придонесат за уште поголема посветеност на здравствените работници.
„Сето она кое што било запоставено во минатото, сега го исправаме. Граѓаните заслужуваат пристојни услови, а здравствените работници – мотивација и поддршка. Му честитам на министерот и сите вклучени во овој процес,“ изјави Мицкоски.
Реконструкцијата на Клиниката за психијатрија е дел од пошироките напори на Владата да го подобри јавното здравство преку модернизација на објектите и опремата. Во дворот на Клиниката денеска беа презентирани и нови медицински реквизити, симбол на трансформацијата која е во тек во здравствениот сектор.