Во изложбениот дел на Воениот музеј, во објектот на Музејот на Република Северна Македонија, денеска е отворена книга на жалост за д-р Александар Стојчев, директор на Воениот музеј, кој по кратко боледување почина на 18 април 2021 година.
-Сите граѓани коишто сакаат да се запишат во книгата на жалост ќе можат тоа да го направат секој ден до петок од 8 до 18 часот, соопшти Министерството за одбрана.
Универзитетскиот професор и воен историчар д-р Александар Стојчев почина пред два дена на 46-годишна возраст во Скопје како последица од коронавирус.
Професорот Стојчев од 2006 година бил раководител на Службата за воена историја – Воен музеј во Министерството за одбрана а претходно во периодот од 2002 година до 2006-тата година бил асистент по Воена историја на Воената академија „Генерал Михаило Апостолски“ во Скопје.
Во својата професионална кариера тој бил и доцент и вонреден професор на Универзитетот Св. Кирил и Методиј во Скопје за област Воена историја и наставник по предметот „Балканските војни и Првата светска војна“ на Универзитетот Гоце Делчев во Штип.
Тој е автор на повеќе книги од областа на воената историја а меѓу најпознатите и најкористените се „Букурешкиот мировен договор и поделбата на Македонија во 1913 година“, „Студија за формирање на Музеј на Првата светска војна“, „Нобеловците и АРМ за мирот“, „Дојран 1915-1918 (Воени операции)“ како и „Историја на воените мапи на Република Македонија“.
