Заменик-претседателот на Советот за безбедност на Русија, Дмитриј Медведев, изјави денеска, откако САД и дозволија на Украина да истрела проектили со долг дострел длабоко на руска територија, дека Москва „има право да возврати со оружје за масовно уништување против Киев и главните НАТО инсталации“ и оцени дека тоа веќе е „Трета светска војна“.
Во објава на својот Телеграм канал, Медведев нагласи дека одлуката на администрацијата на американскиот претседател во заминување Џо Бајден може да се оквалификува како напад на членките на НАТО врз Русија.
„Употребата на ракетите на алијансата на овој начин сега може да се квалификува како напад врз Русија од страна на земјите од блокот. Во овој случај, Русија се повикува на правото да возврати со оружје за масовно уништување против Киев и главните инсталации на НАТО, ова е веќе Трета светска војна“, напиша Медведев, пренесува „Известија“.
