Косовскиот министер за надворешни работи, Беџет Пацоли, рече дека на премиерката на Србија, Ани Брнабиќ, нема да ѝ биде дозволен влез во Косово поради нејзината изјава за Албанците додека тој е шеф на косовската дипломатија.
Пацоли на „Фејсбук“ напиша дека српската премиерка промовира расистичка идеологија.
Овој институционализиран расизам во Србија е вроден во болна ултранационалистичка идеологија промовирана од владата на Ана Брнабиќ. Верувам дека Европа разбира со какви луѓе си имаме работи, со луѓе што поддржуваа масовни убиства и ги негираат воените злосторства извршени од страна на Белград во поранешна Југославија, напиша Пацоли.
Тој додава дека е тежок и неприфатлив коментарот на Брнабиќ даден во присуство на шефот на делегацијата на ЕУ во Србија, Сем Фабрицио, дека се работи за луѓе што дошле од шума.
Брнабиќ одговори дека верува оти кога ќе сака да го посети Косово, тоа ќе ѝ биде овозможено без оглед на изјавите на приштинските функционери.
Не сум загрижена за таквите изјави и верувам дека ќе ми биде овозможено да одам во Косово кога ќе сакам, рече Брнабиќ.
Таа додаде дека таквите изјави се и против интересите на Албанците, не само европски туку и цивилизациски вредности.
Додаде дека, сепак, не очекувала ваков потег од Пацоли затоа што, како што рече, тој не е еден од луѓето од шума за кои зборувала.
Тие во униформи беа во шума, излегоа од неа и директно станаа дел од политичката елита во Приштнина. Би сакала да беа дојдени од невладиниот, граѓанскиот сектор, но не се од таму дојдени. Пацоли не излегол од шума и затоа ме чуди што се почувствувал повикан, рече Брнабиќ.
