На европските берзи најважните индекси во петокот беа во благ плус, при што паневропскиот индекс Stoxx 600 достигна ново рекордно ниво, предводен од растот на цените на акциите на „Standard Chartered“ и BASF.
Во првиот дневен пресек од тргувањето, индексот Stoxx 600 порасна за 0,09 отсто, на 495 поени, а со тоа и на пат кон нова добивка петта недела по ред. Истовремено, франкфуртскиот DAX порасна за 0,02 отсто, на 17.373 поени, лондонскиот Ftse за 0,16 отсто, на 7.696 поени, а парискиот CAC за 0,09 отсто, на 7.918 поени.
Најголем добитник беше акцијата на британската банка „Standard Chartered“ со скок на цената од 6,7 отсто, откако објави дека ќе откупи свои акции во вредност од милијарда долари благодарение на растот на профитот.
Значително порасна и цената на акцијата на германскиот хемиски гигант BASF, која објави дека оваа година планира дополнително да ги намали трошоците за милијарда евра и дека очекува обновување на основната добивка. Ова ја зголеми цената на акцијата на компанијата за 1,5 отсто и го поттикна растот на индексот на хемискиот сектор за 0,7 отсто.
Сепак, инвеститорите се внимателни, бидејќи беше објавено дека германската економија во четвртиот квартал забележа пад од 0,3 отсто. Преовладува претпазливост и пред денешните изјави на водечките функционери на Европската централна банка (ECB), вклучително и претседателката на банката Кристин Лагард, додека инвеститорите чекаат сигнали за натамошниот правец на монетарната политика во еврозоната.
