Поглаварот на Римокатоличката црква, папата Франциск, вети правда за жртвите на сексуална злоупотреба во Католичката црква, а германските власти размислуваат да започнат дополнителна истрага откако независната истрага покажа дека пензионираниот папа Бенедикт Шеснаесетти не одговорил на четири случаи на злоупотреба што ја знаел како архиепископ во Минхен.
Во долгоочекуваниот извештај за сексуалното насилство во Минхенската надбискупија, беа упатени обвинувања против поранешниот папа Бенедикт Шеснаесетти, кој беше надбискуп на Минхен од 1977 до 1982 година.
Се наведува дека знаел за свештениците кои ги малтретирале децата и кои сепак останале на своите позиции, а црквата молчела за тие обвинувања.
Адвокатската канцеларија Вестпфал Спилкер Вастл, која го подготви извештајот, рече дека поранешниот папа продолжил да негира дека сторил или знаел за какво било кривично дело.
Еден ден по објавувањето на извештајот, папата Франциск се сретна со официјални лица од Ватикан кои се занимаваат со случаи на сексуална злоупотреба.
Во својот говор, папата не се повика на извештајот, туку изјави дека црквата и понатаму забележува случаи на сексуални престапници во таа институција.
– Со божја помош, црквата со цврста решеност ја исполнува својата обврска да обезбеди правда за жртвите на злоупотреба од страна на нејзините членови, применувајќи го канонското законодавство предвидено со посебна грижа и строгост – рече папата.
Тој додаде дека нормите се подобрени за да се направи поефикасно управувањето со случаите на злоупотреба. Обвинителите во Минхен соопштија дека истражуваат 42 случаи на можни прекршувања од страна на црковните службеници кои произлегуваат од извештајот.
Портпаролката Ен Лејдинг за германската новинска агенција ДПА изјави дека случаите им биле упатени од адвокатската канцеларија што го подготвила извештајот.
Адвокатската канцеларија соопшти дека во случаите станува збор за живи луѓе кои сè уште се на функција во црквата.
Портпаролката на германскиот канцелар Олаф Шолц, Кристијана Хофман, рече дека овие наводи треба итно да се истражат.
Ватикан сè уште не реагирал на извештајот, а најавено е дека внимателно ќе го прочита во наредните денови.
Секретарот на Бенедикт, монсињор Георг Генсвејн изјави дека ниту поранешниот папа не го прочитал извештајот, но дека ќе го стори тоа.
Тој додаде дека Бенедикт, кој им дал информации и на авторите на извештајот, бил вознемирен и засрамен од скандалот.
За време на службата на Бенедикт на чело на Католичката црква во 2010 година, се иницира прашањето за сексуална злоупотреба во редовите на црквата, што предизвика голем скандал.
Меѓутоа, претходно, во 2001 година, тој ја донесе тогашната револуционерна одлука да преземе одговорност за гонење случаи на злоупотреба, откако сфати дека епископите ширум светот не ги казнуваат сторителите, туку само ги преместуваат од парохија во парохија и им дозволуваат повторно да вршат злосторства.
