Претседателот Стево Пендаровски вечерва ја прими претседателката на Европската комисија, Урсула фон дер Лајен, која престојува во посета на Македонија. Како што соопшти прес-службата на претседателот, тие разговарале за процесот на пристапните преговори на земјава за членство во Европската Унија, за актуелните политички случувања во Македонија и за тековните состојби во регионот.
Во таа насока беа разменети информации за натамошните фази во преговорите по завршување на скриниг прoцесот и за динамиката на спроведување на реформите, стои во соопштението.
На средбата, исто така, било разговарано за претстојниот извештај на Европската комисија за напредокот на Македонија како земја-кандидат, како и за Планот за раст на западен Балкан, при што претседателот Пендаровски се заблагодари за поддршката и посветеноста од Европската унија на политиката на проширување и интеграција на земјите од западен Балкан.
Пендаровски и фон дер Лајен размениле и мислења за стратешката важност од спроведување на измените на Уставот и натамошните импликации врз европската перспектива на земјава, се наведува во соопштението на претседателскиот Кабинет.
