Пентагон соопшти дека потрошил 424 милиони долари за воената кампања против групата Исламска држава во Сирија и во Ирак, објави МИА.
Портпаролот на американското Министерство за одбрана, контраадмирал Џон Карби изјави дека Пентагон просечно дневно троши 7,6 милиони долари за воздушните напади и за разузнавачките летови.
Тој истакна дека локалните безбедносни сили во Ирак бележат успеси во борбата против џихадистите, а во Кобане локалните курдски сили контролираат поголем дел од градот.
– Напредокот е бавен и тешко е да се каже кога ќе има пресврт во битката со ИД, наведе Карби.
Тој истакна дека е можно оружјето фрлено од американските воени авиони за курдските борци да е земено од исламистите, но оти не може да ја потврди вчера емитуваната видео-снимка на која се гледа американско оружје во рацете на екстремистите.
– Во неделата за Курдите кои се борат во Кобане, беа фрлени 28 пакети. Еден од нив е уништен за да не биде одземен од непријателот, соопшти Централната команда на САД.