Триумфот на Доналд Трамп на претседателските избори во САД е пораз за „либералната“ идеологија, изјави словачкиот премиер Роберт Фицо.
Како и Трамп, Фицо за влакно преживеа обид за атентат за кој тој тврдеше дека е производ на високополаризирано медиумско опкружување.
„Го почитуваме изборот на американските граѓани, бидејќи не се мешаме во внатрешната политика на другите држави и не држиме никому предавања“, рече Фицо во средата.
Честитајќи му на Трамп, Фицо неговиот избор го нарече „пораз на либералните и прогресивните идеи“.
Словачкиот премиер продолжи да го критикува известувањето на американските медиуми за кампањата, посочувајќи дека исходот од гласањето е сосема спротивен од она што тие се обидувале да го создадат. Победата на Трамп потврди дека „никогаш не треба да се верува на медиумите и на анкетите“, кои „90% се направени по нарачка“, рече Фицо.
ЕУ во Брисел „ќе се испоти“ како одговор на победата на Трамп, рече Фицо, истакнувајќи дека промената на околностите во Вашингтон може да отвори прашања за идниот однос меѓу САД и ЕУ.
Словачкиот претседател Петер Пелегрини, исто така, му честиташе на Трамп, ветувајќи дека „ќе ја направи трансатлантската врска повторно голема“ и вети дека Братислава ќе остане „силен и сигурен сојузник“ на НАТО.
Во меѓувреме, Фицо изрази надеж дека Трамп би можел да повика на итен прекин на огнот во Украина и рече дека го поддржува мировниот план изнесен од Кина и Бразил за да се стави крај на конфликтот со Русија што е можно поскоро.
