Модниот дизајнер роден во Шпанија, Пако Рабан, почина на 88-годишна возраст. Компанијата која го поседува брендот Paco Rabanne денес ја објави смртта на дизајнерот познат по парфемите и металот како и модата од вселенската ера. Компанијата за мода и убавина Пуиг го опиша Рабан како „дизајнер-визионер“ и „меѓу најзначајните модни фигури на 20 век“. Модната куќа Rabanne ги прикажа денес своите колекции во Париз во чест на Рабан и треба да ги открие најновите дизајни на брендот за време на претстојната модна недела од 27 февруари до 3 март.
Коко Шанел наводно го нарече Рабан „металургот на модата“. Тој користел различни видови метал во неговите дизајни, вклучувајќи метали поврзани со средновековните витези. Сите го славеа неговиот необичен стил и смелост како „неспојливите“ модни дизајни и материјали, но тоа стана негов заштитен знак по кој беше препознатлив.
Тој на модната сцена се појави во 60-те години на минатиот век, најпрвин како дизајнер на накит за „Givenchy“, „Dior“ и „Balenciaga“, за во 1966 годинa да отвори сопствена модна куќа.
Во 1999 година, Пако Рабан се повлече од светот на модата и оттогаш ретко беше виден во јавноста, а многумина зборуваа дека тој е синоним за естетика, како и дека неговите парфеми се најпродавани во светот.
Весникот Le Telegramme го цитираше градоначалникот на Ван, Дејвид Робо, кој рече дека Рабан починал во неговиот дом во градот Портсал во регионот на Бретања.