Со денешната церемонија на свечено отворање започна петтата регионална вежба „РЕГЕКС 19“, која ќе се реализира до 18 октомври во Центарот за симулации во касарната „Алексо Демниевски Бауман“ во Велес.Целта на вежбата е оспособување и извежбување на штабен армиски персонал за работа во мултинационална средина при планирање и водење на мировни операции предводени од НАТО.
Командантот на Здружената оперативна команда, генерал-мајор Павле Арсоски во своето обраќање го нагласи значењето на оваа вежба како можност земјите да имаат специфични обуки за нивните единици и да ги доведат нивните способности до ниво со кое успешно ќе одговорат на моменталните предизвици во областите каде треба да се одржува безбедноста, мирот и стабилноста во регионот.
Оваа компјутерски асистирана вежба е прва од ваков тип која се реализира во земјава, на која покрај припадниците на Армијата на Република Северна Македонија учествуваат 230 претставници од 18 држави од четири континенти.
На вежбата, припадниците на нашата армија и припадници на армиите на три земји членки на НАТО, Партнерство за мир, Медитеранскиот дијалог, Истанбулската иницијатива како и партнерски земји на НАТО во светот заеднички, преку компјутерски симулации ќе решаваат разновидни сценарија кои ќе ја покажат интероперабилноста во решавање на современите безбедносни предизвици согласно со стандардите на НАТО.
Симулацискиот центар од составот на Командата за обука и доктрини во следните неколку денови ќе има можност да ги покаже своите капацитети за изведување на овој вид на активности од овој обем.
За успешна реализација на вежбата во планирачкиот процес претходеа седум НАТО и седум национални работилници. Претходно циклусот вежби „РЕГЕКС“ се реализираше во 2014 година во Турција, 2015 во Грција, 2016 во Босна и Херцеговина, 2017 во Јордан и 2018 во Србија.
Задутре пред воениот врв на денот за високи гости ќе бидат презентирани активностите кои се изведуваат на вежбата, како и капацитетите на армискиот Центар за симулации.
