![vlado janevski](https://i0.wp.com/netpress.com.mk/wp-content/uploads/2024/08/vlado-janevski.png?resize=696%2C426&ssl=1)
Македонскиот поет, писател и ликовен уметник, Владо Јаневски од Австралија е годинашниот добитник на наградата „Стојан Христов“ за најдобра книга со поезија од иселеник што ја доделува Агенцијата за иселеништво, во рамки на „Струшките вечери на поезијата“.
Жири-комисијата во состав Митко Гогов, претседател и Иван Шопов и Игор Трпески членови од пристигнатите пет книги, одлучи ова признание да го додели на Јаневски за поетската збирка „На грбот на неповратот“.
![](https://i0.wp.com/mia.mk/articles/images/%D0%BF%D0%BE%D0%B5%D1%82%D0%BE%D1%82%D0%B8%D0%BF%D0%B8%D1%81%D0%B0%D1%82%D0%B5%D0%BB%D0%B2%D0%BB%D0%B0%D0%B4%D0%BE%D1%98%D0%B0%D0%BD%D0%B5%D0%B2%D1%81%D0%BA%D0%B8%D0%B4%D0%BE%D0%B1%D0%B8%D1%82%D0%BD%D0%B8%D0%BA%D0%BD%D0%B0%D0%BD%D0%B0%D0%B3%D1%80%D0%B0%D0%B4%D0%B0%D1%82%D0%B0%D1%81%D1%82%D0%BE%D1%98%D0%B0%D0%BD%D1%85%D1%80%D0%B8%D1%81%D1%82%D0%BE%D0%B2%D0%BD9brq7/kMbafYlsm/large.webp?w=696&ssl=1)
Поетската збирка „На грбот на неповратот“ од македонскиот поет, писател и ликовен уметник Владо Јаневски од Австралија несомнено се издвојува од останатите по квалитетот, поетскиот пристап, како и естетските вредности со кои се одликува. Јаневски пишува приказно и прецизно, стилски префинето, а стиховите се надоврзуваат ритмично, честопати со наративните тонови балансирајќи меѓу личното и колективното, интимното и општочовечкото, стои во образложението на жири-комисијата.
Како што е наведено во соопштението, песните се испишани со куси, слободни стихови, а тоновите во нив се меланхолични, рефлексивни, на моменти мрачни, но и имплицитно бунтовни.
Евидентна е и јасно видлива грижата за структурата на книгата при поделбата на пет тематски кохерентни циклуси, кои сочинуваат цврста заокружена целина, соопшти жири-комисијата.