Ниту катастрофалните поплави во кои загинаа најмалку 16 лица не можеа да ги обединат политичарите во Босна и Херцеговина кои не можат да се договорат кој да прогласи ден на жалост.
Лидерот на босанските Срби, Милорад Додик, во саботата изјави дека му е жал за луѓето кои загинаа во поплавите во БиХ или останаа без своите домови и имоти, но ја отфрли можноста во земјата да се прогласи ден на жалост.
Претседателот на Република Српска смета дека државата нема никаква врска со прогласување ден на жалост и дека такви одлуки можат да носат само ентитетите.
„Советот на министри на Босна и Херцеговина не е овластен да го стори тоа и нема да донесе таква одлука, но владите на Федерацијата на Босна и Херцеговина и Република Српска ќе го сторат тоа“, изјави Додик за новинарите во Бања Лука.
