Под влијание на циклонска активност утре времето ќе биде облачно со врнежи од дожд, кои попладне и во текот на ноќта на повеќе места ќе бидат обилни (над 25 л/м2 за 24 часа). Локално ќе биде нестабилно со поинтензивен пороен дожд и грмежи (над 30 л/м2 за 12 часа), особено во југоисточните и источните делови од земјава.
Повремено ќе дува засилен ветер од јужен правец (над 60 км/час). Минималната температура ќе биде во интервал од 9 до 15, а максималната ќе достигне од 12 до 17 степени.
Во Скопје облачно со врнежи од дожд, кои попладне и во текот на ноќта ќе бидат пообилни и поројни. Ќе дува умерен, повремено засилен југоисточен ветер, особено претпладне. Минималната температура ќе се спушти до 11, а максималната ќе достигне 15 степени.
Локални врнежи од дожд ќе има и во понеделник, особено претпладне. На повисоките врвови на северозапад ќе врне снег. Нов влажен бран се очекува во вторник кон крајот на денот и во среда претпладне.
На Попова Шапка утрово е најстудено, четири степени, а максимални 19 степени се измерени во Струмица.
Според УХМР, на Попова Шапка се измерени и најмногу врнежи, во изминатите 24 часа вкупно 14 литри на метар квадратен.
До 8:30 часот утрово температурата е седум степени во Лазарополе, 8 во Маврови Анови, 9 во Крушево, 10 во Претор, 12 во Тетово, Охрид, Битола, Прилеп и Куманово, 13 во Скопје Зајчев Рид и Дебар, 14 во Гевгелија и Берово, 16 во Крива Паланка, Виница и Дојран, 17 во Скопје-Петровец и Штип, како и 18 степени во Демир Капија.
Најмалку врнежи изминатите 24 часа имало во Охрид, два литра на метар квадратен. Измерени се и 12 литри во Пожаране и Маврови Анови, 11 во Лазарополе, 10 во Тетово, 7 во Претор, 6 во Прилеп, 4 во Битола и Крушево, како и 3 литри во Скопје-Зајчев Рид и Дебар.