Поплавите во Бангладеш уништија околу 1,1 милион метрички тони ориз, покажуваат податоците на Министерството за земјоделство, принудувајќи ја владата на итен увоз на овој основен прехранбен продукт.
Поплавите беа предизвикани од обилните монсунски дождови, во два големи брана кои однесоа најмалку 75 човечки животи во август и октомври и ја загрозија егзистенцијата на милиони луѓе. Најмногу штети претрпеа посевите на истокот и северот на Бангладеш.
Во такви услови, производството на ориз е значително намалено, соопшти Министерството за земјоделство, додавајќи дека власите имаат намера да увезат 500.000 тони ориз со забрзано темпо. Се очекува наскоро да се дозволи увоз и во приватниот сектор, изјави претставник на министерството.
Преодната влада се обидува да ги стабилизира цените на храната, кои последните месеци пораснаа за речиси 20 отсто.
Поголемиот увоз на Бангладеш би можел да значи повисоки испораки за Индија, најголемиот светски извозник на ориз, кој во септември ја намали својата извозна давачка за „парбоилд“ оризот на 10 отсто.
Поплавите оштетија и други земјоделски култури, па производството на зеленчук е намалено за 200 илјади тони. Штетата од поплавите во земјоделството беше проценета на околу 45 милијарди таки (380 милиони американски долари).
Бангладеш произведува 40 милиони тони ориз годишно и е трет по големина производител во светот. Оризот е основна храна во земјата со 170 милиони жители, но родот често претрпува штети од природните непогоди, па владата е принудена да го увезува.
„За да се обезбеди снабдување со храна во услови на сè потешки климатски предизвици, неопходно е, покрај сортите кои брзо созреваат, да се развијат повеќе сорти отпорни на поплави и суша“, смета главниот научен директор на Бангладешкиот институт за истражување на оризот, Кандакар Мохамад Ифтехарудаула.
„За да се развијат вакви сорти, потребно е да се инвестира во земјоделски истражувања“, нагласува Ифтехаруддаула.
Анализата од 2015 година на Институтот на Светската банка покажа дека 3,5 милиони луѓе во Бангладеш се во опасност од поплави, забележува Reuters.
