Министерот за земјоделство, шумарство и водостопанство Љупчо Николовски и извршниот директор на ЦЕС, д-р Карл Филип Хигин, денеска го потпишаа Договорот за имплементација на четирите системи за наводнување по долината на реката Вардар како дел од Програмата за наводнување.
Историски проект во водоснабдувањето вреден над 100 милиони евра, кој обезбедува наводнување на нови 13.650 хектари земјоделско земјиште. Наводнувањето на земјоделското земјиште е главниот основ за квалитетно домашно земјоделство. Нема квалитетен род, без наводнување. Постојано сите овие години, посветено работиме во модернизирање на националниот систем за наводнување на земјоделското земјиште, градејќи нови и реконструирајќи ги постојните системи за наводнување на земјоделското земјиште. Чест ми е што денес имам можност да потпишеме нов договор за консултантски услуги, преку кој започнуваме со реализација на нови четири значајни капитални инвестиции во водоснабдувањето, обезбедувајќи сигурно наводнување за нови 13.650 хектари земјоделско земјиште“, рече Николовски.
Ова според него е и историски, досега најголема капитална инвестиција во водоснабдувањето во земјава.
„Овие четири системи за наводнување се дел од Програмата за наводнување на Северна Македонија и се протегаат по сливот на реката Вардар. Станува збор за Хидросистем „Лисиче“, кој ги опфаќа земјоделците од општините Велес и Чашка и би обезбедил наводнување за 3.650 хектари земјоделско земјиште. Потоа Хидросистем „Пепелиште“, кој ги опфаќа општините Неготино и Демир Капија, со наводнување на површини од 3.000 хектари. Третиот важен проект е Хидросистем „Страиште“, кој ја опфаќа општина Валандово наводнувајќи земјоделска површина од 1.500 хектари. Четвртиот е Хидросистем „Конско“ кој опфаќа наводнување на 5.500 хекатари земјоделско земјиште од општините Гевгелија, Богданци и Дојран“, додаде Николовски.
