Полските земјоделци повторно блокираа четири главни гранични премини меѓу Полска и Украина за сообраќај на камиони во четвртокот претпладнето.
„По паузата за празниците, утринава ја продолживме блокадата на преминот Медика бидејќи не беше постигнат писмен договор со владата“, изјави за AFP Рафал Кондров, еден од организаторите на протестот, додавајќи дека блокадата ќе трае до 3. февруари.
Полските земјоделци посочуваат дека и понатаму трпат штети поради падот на цените поради увозот на украинско жито на почетокот на минатата година и бараат субвенции и поволни кредити.
Трите главни гранични премини се блокирани од почетокот на ноември. Полските патни транспортери протестираат против „нелојалната конкуренција“ од украинските камионџии и против олеснувањето на правилата за пристапување во ЕУ за компаниите од таа земја.
„Разговараме со владата, но засега без резултати“, изјави во четвртокот за AFP еден од организаторите на блокадата.
На преминот се пропуштаат само три камиони на час, патнички сообраќај и транспорт со хуманитарна и воена помош.
Новиот полски премиер Доналд Туск изјави во средата дека ќе се обиде да ги убеди полските превозници да не ја користат блокадата како средство за заштита на нивните интереси и нагласи дека владата „ќе стори сѐ“ за да ги заштити нивните интереси од нелојалната конкуренција на украинските превозници.
Претставниците на Варшава, Киев и ЕУ неколкупати разговараа за кризата, но досега не постигнаа договор.
