Образложувајќи ја интерпелацијата на министерот за внатрешни работи, Оливер Спасовски, пратеникот Халил Снопче од Алијансата на Албанците, рече дека тоа што сега Мијалков е во притвор не е пречка да се дискутира за интерпелацијата. Таа беше поднесена по повод бегството на Мијалков.
-Го прашувам Спасовски дали чувствува одговорност? Тој рече дека одговорноста е кај системот, сакаше да се амнестира себе си заборавајќи дека е главен одговорен за системот. Се поставува прашање кој го контролира системот? Треба да има политичка одговорност. Имавме и изјава од шефицата на Обвинителството за гонење на организиран криминал и корупција, Вилма Русковска која се амнестира себе си префрлајќи ја вината во МВР и рече дека МВР ги има потребните информации. Во оваа држава имавме две спектакуларни бегства. Прво Груевски, а по него и Мијалков, без разлика што сега е во затвор. Нормално, никој не верува дека ова може да се случи без логистичка поддршка од МВР. Ние ги знаеме изјавите на министерот, тој ќе најде причини и ќе се амнестира. Меѓутоа, помеѓу неговите зборови и перцепцијата на граѓаните постои голем јаз односно никој не верува дека бегството е без логистичка поддршка од МВР, рече Снопче.
Пратеникот зборуваше и за случајот со издавањето на 214 пасоши на криминалци од странство. Посочи дека доколк акцијата била пробиена, тоа е причина плус за поднесување на оставка.
-Ако е деконспирација, тоа дополнителна причина е за одговорност. Како може да излезат информации од еден орган кој треба да гарантира безбедност и доверба, рече пратеникот.
Тој исто така додаде дека МВР е во служба на мафијата.
-МВР не работи во јавен интерес туку е ставено во служба на мафијата. Околу 60 проценти од граѓаните не веруваат во МВР и тоа е од пред скандалот со пасошите што значи дека сега довербата е уште поголема, рече Снопче.
