Најдобриот тим во лигата Бостон Селтикс ја забележаа четвртата победа во низа, односно вкупно 52-ра сезонава, победувајќи ги пред своите навивачи Феникс Санс со 127:112 со уште еден одличен настап на Џејлен Браун и Џејсон Тејтум. Првиот постигна 37 поени со три асистенции и пет скока, а вториот додаде 26 поени со по пет асистенции и скока. Овојпат ги следеше искусниот Ал Хорфорд кој со 6 од 10 за „тројка“ постигна 24 поени. Воедно, Бостон и математички обезбеди пласман во плеј-офот.
Кај Феникс дури четворица играчи постигнаа 20 или повеќе поени, но тоа беше премалку за најсилниот тим во лигата. Девин Букер постигна 23, Бредли Бил 22, а Кевин Дурент и Грејсон Ален по 20.
Бостон сега има скор од 52-14 и е прв на Истокот, додека Феникс е на седмата позиција на Западот со 38-28.
По четири победи во низа, Далас Maверикс беа поразени од Оклахома Сити со 119:126, што не треба да чуди бидејќи кај гостите не настапи Лука Дончиќ поради полесна повреда на тетивата. Кај Тандер, Шаи Гилџеус-Александер повторно беше најдобар со 31 поен, пет асистенции и девет скока, додека Џејлен Вилијамс додаде 27 поени. Далас го предводеа Кајри Ирвинг со 36 поени и 12 асистенции и Тим Хардавеј Јуниор. кој имаше 23 поени и девет скока.
Милвоки Бакс ги победија Филаделфија 76ерс со 114:105. Филаделфија без Џоел Ембиид беше подобра во првото полувреме, имаше и плус три по третиот период, но Милвоки направи пресврт во последниот со 34:22. Јанис Адетокумбо беше најдобар на теренот со 32 поени, 11 скока и седум асистенции. Од друга страна, Тајрис Мекси постигна 30 поени со четири скока и асистенции.
Милвоки се втори на Истокот со 43 победи и 24 порази, додека Филаделфија паднаа на седмото место со 36-30.
Њујорк Никс ги победија во Портланд Трејл Блејзерс со 105:93 кршејќи го отпорот на противникот во втората четвртина која ја добија со 29:16. Тоа беа клучните моменти од натпреварот во кој одличниот Џејлен Брансон го предводеше Њујорк до победаат. Натпреварот го заврши со 45 поени, иако имаше многу слаби шут за „тројки“ 2-10. Најблиску до него на листата на стрелците кај Њујорк беа ОЏеј Ануноби и Донте ДиВинченцо со 12 поени. Центарот Деандре Ајтон беше најдобар кај Портланд со 31 поен и 14 скока.
Лос Анџелес Клиперс победија на гостувањето кај Чикаго Булс со 126:111. На оваа средба решавачка беше првата четвртина во која гостите од Лос Анџелес се одлепија на двоцифрена предност и потоа ја задржаа до крајот. Така, ЛА Клиперс ја прекина кратката серија од два врзана пораза.
Најдобри играчи на гостинскиот тим беа Пол Џорџ со 28 поени, седум асистенции и пет скока и Кави Ленард со 27 поени и пет скока.
